Онцлох уран бүтээлч 2020-2021


Монголын Урлагийн Зөвлөлийн 2020-2021 онд  дэмжиж, хамтран ажиллах  “Онцлох уран бүтээлчид” тодорлоо.


Монголын Урлагийн Зөвлөл (МУЗ) нь 2019 онд салбар салбарын авьяаслаг залуу уран бүтээлчдийг дэмжих, хамтран ажиллах, тэдний уран бүтээлийг олон нийтэд сурталчлах зорилгоор “Онцлох уран бүтээлч” төслийг санаачилсан билээ.

2019 онд МУЗ нь дүрслэх урлаг, хөгжим, бүжиг, яруу найраг, кино урлагийн салбарын авъяаслаг уран бүтээлч гоёл чимэглэлийн урлаач Э.Цагаанцоож, бүжигчин Ж.Номгонмаа,  зохиолч, яруу найрагч Э.Үлэмжтөгс, “Зун” продакшн болон  “No wonder” продакшны уран бүтээлчидтэй “Улаан гэр” бүтээлч орон зайд зураг авалт, сургалт, үзэсгэлэн, зохион байгуулах, уран бүтээл туурвих, олон улсын үзэсгэлэнд бүтээлээ танилцуулах, соёлын солилцоонд оролцох, олон улсын кино төсөлд хамтран ажиллах, шаардлагатай тоног төхөөрөмжөөр хангах зэрэг чиглэлээр амжилттай хамтын ажиллагаа өрнүүлсэн.

Харин 2020-2021 онд МУЗ нь график дизайнер Ц.Эрхбаяр, гэрэл зурагчин Б.Бат-Оргил, ятга хөгжимчин Ө.Ариунхишиг, урлаг судлаач Ц.Батсайхан, яруу найрагч Д.Гансаруул нартай хамтран ажиллахаар боллоо. “Онцлох уран бүтээлч” нь зөвлөлийн дэмжлэгтэйгээр өөрсдийн уран бүтээлээ олон нийтэд таниулах, шинэ санаачлага, төсөлд хамрагдах боломжоор хангагдах бөгөөд байгууллагын зохион байгуулж буй арга хэмжээнд уригдан оролцож, хамтын ажиллагаагаа тэлж, танилын хүрээгээ өргөжүүлнэ. Мөн МУЗ-ийн “Улаан Гэр” бүтээлч орон зайд өөрсдийн уран бүтээлээ туурвих, сургалт, арга хэмжээ зохион байгуулахад хамтран ажиллана. 2020-2021 онд хамтран ажиллах уран бүтээлчдийн танилцуулга болон төлөвлөгөөт ажлын мэдээллийг “Улаан Гэр” бүтээлч орон зайн https://www.facebook.com/RedGerArtGallery/ цахим хаяг, https://redger.org/ хаягаар авна уу.